مفاهيم مختلفة

خليل

-أظن أن القوات المتحالفة ضد العراق سوف تقوم قريباً بقصف مواقع حساسة في العراق ...

-ما علينا ... اليوم بدها تيجي أختي وزوجها يسهروا عنا وجايبين معهم أشرطة فيديو بتجنن .... يعني اليوم سهرتنا صباحي ...

-يا زوجتي الحبيبة أنا اليوم متعب ولا أستطيع أن أستقبلهم ولا حتى أن أسهر معهم ...

-نعم .. نعم ...شو ناوي تخربط علينا الكعدة ... أي والله والله لو بتصير عامل أي حركة من حركاتك إياهم غير أتركلك الدار والأولاد وأشوف كيف بدك تربيهم ...

-يعني ذلك أنك لا تستطيعين الاعتذار لهم عن السهرة ...

-وليش أعتذر يا با ... ما هو أنا إلي رتبت لهالكعدة ...

-ألم يكن من الأولى أن تسأليني قبل أن تتخذي مثل هذا القرار؟...

-كرار ... كرار شو هاظ إلي بدي أشاورك فيه ... أي هو كرار من الكونكرس باكي... أي أنا كل الكرارات ما بتخش مخي ...

-يا زوجتي الحبيبة : يجب علينا أن نراعي شعور بعضنا البعض لنكوّن أسرة مثاليّة ...

-شو هاي إلي بتكول عنها ... هاي .. هاي المسالية ...

-المثالثة يا زوجتي ...

-مسالية والا مثالية إلي هو ...

-المثالثة تعني أن نكون أنموذجاً من ............

-وكف وكف عندك .. أي هو أنا فاهمة الأولى لما أفهم الموذج هاي!!! ...

-دعيني أقربها لك .. أنا وأنت زوجان وربا أسرة تتكون منك ومني وأطفالنا الخمسة ...

-ربنا يحرسهم من العين ... من شر حاسد ... من شر حاسد...

-نعم نعم أسأل الله أن يحفظهم ويحرسهم ... المهم أقول أننا نكون أسرة وهذه الأسرة تحتاج إلى مقومات لكي ...

-عندك .. عندك .. شو يعني مكاومات هاي ؟؟ أنا سامعيتها كثير بالتلفزيون ومش فاهميتها ...

-ليست هذه كتلك ... ليست المقاومات التي يتحدث عنها التلفاز بل هي مقوّمات يعني الأمور التي يرتكز عليها أي أمر حتى يكون قوياً ومتيناً ...

-خلصني بسرعة .. مش فاظية عندي شطف ومسح وترتيب البيت وكمان بدي أجهز شوية حلويات لزوم السهرة الليلة ... وبدي إياك تشد طولك شوي وتنزل على السوك وتجيبلي شوية تسالي وببسي ولا تنسى باكيت دخان مالبورو...

-دخان !!! ولمن هذا الدخان ؟؟ أنا لا أحب الدخان ولا أحب من يتعاطاه ...

-مش إلك يا زلمة ... هاظ لزوج أختي منته عارفه ما بدخن إلا من النوع الغالي ولازم إحنا نكرمه وما تكصر ركبتي كدامه ...

-حسبي الله ونعم الوكيل ... حسبي الله ونعم الوكيل ...

-يالله يا زلمه عاد بعدك كاعد ... تحرك ما في وكت ...

-أعطني بعض النقود منك ...

-شو نكود ؟؟ أي نكود هاي؟؟؟ ...

-مصاري ... مصاري ... هكذا سوف تفهمين ...

-أي والله ما معي ولا كرش أحمر...

-أين ذهبت في النقود التي أعطيتك إياها ؟ ألم أعطك صباحاً عشرون ديناراً ...

-بلا عشرين بلا ثلاثين ... أي شو هنّه العشرين دينار في الوكت هاظ ...
إجت عندي جارتنا أم العبد وأم سمير وأم عماد وأم أمجد ومعهن اولادهن وأنا الله وكيلك ما كصرت معهن واعملتلهن فطور وغديتهن كمان ... أسكت أسكت يابو محمد والله انهد حيلي اليوم ...

-وأين الأكل؟؟ أليست لي حصة في الطعام ؟؟ أنا جائع وأريد أن آكل ...

-والله ما ظل يا بو محمد .. ما شالله عليهم ما خلو شي أكلوا الأخظر واليابس... دبر حالك برغيف ساندويش لأني مش فاظية أعملك أكل ... يا دوب أجهز حالي ...

-ماذا أقول غير أن الله مطلع على كل شيء والله المستعان ... الله المستعان ...

-تنساش تغير لي هاي لهجتك الفصحى .. الناس بتتكدم وانت كل مالك لورا.. كال مثكف كال ...والله ما أنا دارية شو مسويتلك الثكافة .. ما في من وراها إلا الفكر .. لو انك زي جوز أختي سايك تكسي ما برظى أكل من ثلاثين نيرة في اليوم ... حسرتي على حظي إلي رماني معاك .. روح ..روح خليها في الكلب تسطح ..

-الله يسامحك يا أبي ... ابتليتني أيما بلاء ...

-شو بتمتم ... اسمع لما أكلك هاه ... غير لي هالموشح هاظ بكفيش متحملة فِكرك الخربان هاظ ... أنا إلي بكول الله يسامحك يابا ... أي والله مهندسين وتكاترة كثير تكدمولي ورفظتهم كلهم وبالآخر أنرمي هاي الرمية ...

-خلص .. خلص ... كافنا شرك يا امرأة .. اختصري الشر ودعي هذه الليلة تنتهي على خير ....